Wednesday 1 August 2012

Press Release (August 01, 2012)


PRESS RELEASE
(August 01, 2012)

July 17, 2012 khan HPC(D) Chairman Pu H.Zosangbera chu Mizoram sawrkarin Indira Gandhi International Airport, Delhi-ah a man a, tunah a kutah a hrêng mek a ni. HPC(D) Chairman hi Mizoram-a cheng Hmarho harsatna a hma theih ang bera chin fel a tul zia Ministry of Home Affairs, Government of India-a hetiang lam enkawltute nena sawi tlâng tura kal a ni.


Tin, June 10, 2012 khan HPC(D) Army Chief Pu Lalropuia leh Deputy Chief of Army Pu Lalbiaknunga te chu HPC(D) Designated Camp, Ankhasuo a thlawh pah a All Parties Leaders (Mizoram) hruaitute nena remna kawng sial dan tur ngaihtuah tlâng tura kal chu Silchar Airport (Assam) ah Mizoram Armed Police (MAP) ten an man tawh bawk a. Hemi All Party Leaders (Mizoram) te inkhawm tur hi Mizoram Chief Minister chuan a hriatpui mai bakah a awka a ni. Mahse, Mizoram sawrkar chuan a thu a bawhchhia a, rinawm loh-ah a insiam a ni. Chu mai chu a ni lo. Hemi inmanna hian Mizoram Sawrkar leh HPC(D) ten Suspension of Operation (SoO) – November 10, 2010 to May 11, 2011- chhungah an puan tawh, zawi zawia indawr tawnna boruak nelawm zawk siam chhoh mektu chu a rawn vaw chhia a; Assam Sawrkar leh HPC(D) te inkara Suspension of Operation (SoO) ding lai chu HPC(D) hruaitute an man hian pawngpawrh takin an bawhchhe bawk a ni.

India Danpui hnuaia dan ding laiin a phalsak anga Mizoram-a cheng Hmarho chanvo dawn tur chu an kut ah pe ve tura HPC(D) ten dan anga nawrna an siam chu Mizoram sawrkar chuan remna leh muanna duh loh ang ziazangin, remna kawng dapa kal an hruaitute lo changa an lo man mai hi HPC(D) chuan a dem takzet a ni. Sinlung Hills Development Council (SHDC) huap chhunga ‘Flag March’ huaihawt emaw, Hmarho hnawlna tur ah Home Department, Government of Mizoram in order (No. D. 32020/24/2010-HMS) a chhuah emaw leh hmanraw remchanga a hman theih niha a ngaih pawl thenkhatte hmanga Hmar tawng, culture le Hmar hnam ro huhbeh a tumte leh chumi chu remchanga laa engkimah hlei a len mai hi HPC(D) chuan a hai lo a, hetiang inrahbehna hi a ngawihpui ngai dawn lo tih a puang nawn leh a ni. Zângkhua a bungbu hlen ngai lo.

Mizoram Sawrkar Home Minister Lalzirliana leh a sangawi zawnpuiten HPC(D) hmahruaina hnuaia Mizoram-a cheng Hmarho chanvo dik taka pe ve tura Sawrkar an nawrh hi an hruaitute mansaka tihreh an inring a nih chuan an tisual hle a ni tih an la hria ang. Chumi sawhkhawk mawh phurtu chu Mizoram Sawrkar ding lai a ni. HPC(D) chuan tun aia nasa zawk hian a thil tum hlen turin a tang sauh dawn a, a hma lak zêl dan tur pawh tun hma aia felfai zawkin a duan bawk dawn. An hruaitu thenkhat hrêng mah se, an chanvo ang chang tur leh an thil tum hlen chhuak tura hma an laknaah tang lehzual sauh tur Hmar pasaltha leh an hruaitu tur za tam tak an la awm. Mizoram sawrkarin sipai chakna leh fin kherh hmanga rahbeh leh thuai chhum a tum nasat poh leh mi huaisen a cho chhuak tam ting mai ang.

Vawiin hian HPC(D) chu Mizoram Sawrkar leh Mizo pawi khawih tuma phiartu anga dik lo taka puh a nih bakah Mizoram-a chengte inlungrualna tikhi tumtu anga puh a ni bawk a. Mahse, Mizoram-a cheng Hmar miten an harsatna tihrehsak tura sawrkara dilna an siam hian tu pawi mah an sawi lo a, tu pawi mah an khawih lo a; Mizo chhungah kan inrual tlangna tur zawk kan zawng ani. India Danpuiin a phalsak kan chanvo, kan pianvo ni hrim chu, a nihna anga hman theih tura kan dinhmun siamsak chu kan phu ang hrimin, chu chu kan dil ve ani. Chu chuan India ram emaw Mizoram State emaw inpumkhatna eng kawng zawng pawhin a khawih buai lo. India sawrkar lakah lungawi loa kan rammut lai pawh khan kan chanvo leh kan pianvo mai ni lo, India laka indan tumin hma kan la a, a nghawng pawh kan tuar nasa tih kan hria. HPC(D) thil tum leh ngiat hi Mizoram State emaw India ram emaw atanga indaidan tumna a ni lo; kan chanvo min rahbehsak chu a neitu dik tak kutah hlan tawh turin kan duh a, chu chu dilin HPC(D) chuan hma kan la ani. Mi tin le hnam tinin an chanvo leh pianvo theuh dik taka an hman hi India Danpui thuthlung a ni a, chu chu hre rengin, Mizoram-a cheng Hmarho chuan kan dil a, kan dilna tihhlawhtlinsak hi India Danpui zawmna a ni a, dodal leh hnawlsak tum chu kan Danpui bawhchhiatna a ni.

HPC(D) Chairman Pu H.Zosangbera chu Mizoram Police ten an kawlh lailawkah Chairman ai aw turin HPC(D) Emergency Executive Council chuan lungrual takin Pu L.T. Hmar chu kan ruat fel bawk.

India khua leh tui tu pawh rilru leh ngaihtuahna dik pu leh hmang apiangin Hmarho chunga Mizoram Sawrkar thiltih dik lohzia hi min hriatpui turin kan duh a, kan ngen bawk a ni. An thiltih dan, inbumna leh fin kherek chhuaha HPC(D) hruaitute an man dan pawh hian engkimah dan an bawhchhiat bakah remna boruak aiin rinhlelhna boruak a hring a, remna leh muanna kawng a tin lo. Khami hmaa remna leh muanna a thlen nana inbiakna tur buatsaih a nih lai pawh khan phuahchawp chhuanlam derthawng tak hmanga inbiakna kawnga a mutan siamtu chu Mizoram sawrkar ding lai hi a ni.

HPC(D) chuan a thiltum a hlen hma chuan chawlhsan a tum lo. Chumi maichamah chuan a tul hun apiangah engkim hlan a inhuam reng.

Sd/-

(AMOS P. HMAR)
Secretary
Hmar People’s Convention (Democratic)
General Headquaters, Sinlung.

No comments:

Post a Comment