Monday 11 June 2012

Hrilfiena le Inhriettirna (June 11, 2012)


HRILFIENA LE INHRIETTIRNA
(June 11, 2012)

June 10, 2012 zing dar 9:00 khan HPC(D) Army Chief Pu Lalropui le Deputy Army Chief Pu Bieknung hai chu Silchar Airport a Mizoram Police/Mizoram Armed Police haiin an man. Hi thiltlung hi pawi ei ti lai zingin inhlemna ditumlo tak ani leiin Mizoram sawrkar chu kan dem takzet.


Mizoram a All Parties hai chun sawttaka inthawk khan HPC(D) le Mizoram sawrkar inbiek remna lampui dapin hma an laka; kar hnih liem taa khan Mizoram Chief Minister le ngei khawm inhmuin inbiekna a um thei dan ding an hril tlanga. Chief Minister chun All Parties thuoitu hai chu inremna lampui dap zawm ding leh YMA le inkarah buoina khawm chiengfel dingin a hril nghe nghe. All Parties hai chun phone a inbiek ringawt nilova hmaisanah inbiek a tul ding ani leiin HPC(D) thuoitu hai le inhmu a tul ding zie chu CM kuomah an intluna. CM khawm chun hmaisana inhmu chu tha a ti thu leh buoina iengkhawm a um naw ding thu chu tawngbauin a hril sa bawk a nih.

Patling le patling inbiekna chu ringzoin HPC(D) hotu hai chu All Parties thuoitu hai leh Tuiruong dunga khuo pakhat takah inhmu dingin Silchar an pan a nih. Ringnaw tieng deiin, Silchar Airport-ah Mizoram sipai hai chun HPC(D) hotu hai chu an lo man a nih.

Mizoram sawrkar chet dan hi a puitling naw a, a nep a; mi dawizep hai chetdan ani lem. Inremna le muongna hi a ditnaw a nih ti chu an hmalak dana inthawkin a sukchieng hle. Lungruol taka inremna chu dap ani naw chun hmu thei ani el naw ding a nih ti chu an sukchieng bawk. Inhlembawlna le lungril chanvea indawr vet leia Mizoram sawrkar le sawrkar naw hai kut chu Hmar haiin kum tamtak ei lo tuor tah. Kawng tinrengah mi suknep tum na karah ei tawng, culture, identity khawm an del hlum tep alo ni tah. Endang theina tha le hmangruo popo hmanga ei ram, ei hnam an sirde hi a tawp a hun tah. To tawk, tawka ei tuor hi ei hun tawng mek khawm hin ngaidam thei naw nih. Siemtu lem chun ngaidam phal naw nih. Pathien ringzoin, HPC(D) chu Hmar hnam le ram damna dingin thang nasa takin la thar a tih.

Sansuokna dar chu ei Pathienin mi vuo pek a ta; Hmar ram le hnam ta dinga tlawmngaina le pasaltha ruok chu ei inrieng nawh. Siet ei tuok lai zingin, hienganga phierrukna tirdakum tak hi kan dem takzet a nih. HPC(D) tha sukzawina tham lem chu a tling nawh. An thilthaw hi inringzo ngai talo dinga an mi hrilna ani ang bawkin fimkhur zuol tang kan tih.

Assam le Manipur a HPC(D) chu Suspension of Operation (SoO) hnuoiah um ei ni lai zingin, chu dan khawm inza lova bawsettu hai chung chu ngaiven ning a tih. A sawrkar lemin dan le tawngbau khawm a vawng indik thei tanaw chun a ramah lem chu inremna le muongna kengkaw thei naw ni hai.

Hmar mipui lo hriet dingin, Assam a Hmarram (Cachar le NC Hills a Hmarbiel kei khawmin) chungchanga khawm sawrkar le inbiekna khawm a fe mek a nih. Pathienin malsawmna hun tha chu Hmar hai ta dingin ami la hawng pek ngei ding chu beiseiin tawngtainaa insantuo zing dingin ei inngen bawk a nih.

Mana um ei hotu hai khawm him taka an suok vat dan ding lampui dap zing a nih. Vawisun khawm Hmar mipui thahnemtawk takin Aizawl District Court a ei hotu hai chu lo hmuokin an lo chibai ani thu ei hrietin, HPC(D) chun Hmar mipui hai kuomah lawmthu ei hril a nih. Kan lawm takzet. Inthuruolna ra tha sir suok dingin Pathienin hun dang dang amin pal tir hi hrethiem lem ei tiu. Mipui lo chiai lo ding le tawngtainaa insantuo zing dingin ei inngen bawk a nih.

Sd/-

(C.T. SUNGTE)
Deputy Chief of Army
Hmar People's Convention (Democratic)
General Headquaters, Sinlung

No comments:

Post a Comment